OG‘IR ARALASHMALARNI TUTKICHINI KIRISH PATRUBOGI O‘LCHAMLARINI TAJRIBAVIY TADQIQ ETISH

Abstract

Olib borilgan tajriba-tadqiqotlar natijasida paxta xom ashyosi tarkibidagi begona og‘ir aralashmalarni ajratib olish samaradorligini oshirishga imkon beruvchi qurilma ishlab chiqildi hamda u Surxondaryo viloyati Jarqo‘rg‘on paxta tozalash korxonasining paxta xom ashyosini ishlab chiqarish jarayoniga uzatish pnevmotransport tizimiga amaliyotga joriy etildi [1, 2, 3].

Paxta xom ashyosini pnevmatik usulda tashish tizimi paxta tozalash korxonalaridagi texnologik jarayonning boshlang‘ich bo‘g‘inlaridan biri hisoblanadi. Mazkur tizim tarkibiga g‘aram buzgich-ta’minlagich, transport quvuri, tosh tutkich, paxta separatori, ventilator hamda chang yig‘uvchi kabi bir qator elementlar kiradi. Ushbu elementlarning har biri pnevmatik tarmoqda shakllanadigan aerodinamik rejimga muayyan darajada ta’sir ko‘rsatadi. Pnevmatik uzatish tizimining bir maromda va barqaror ishlashini ta’minlovchi asosiy shartlardan biri paxta xom ashyosini tarmoqqa bir tekis va uzluksiz ravishda berib turishdan iborat.

Paxta xom ashyosini ishlab chiqarish jarayoniga uzatish texnologiyasini takomillashtirish bo‘yicha ko‘plab texnik ishlanmalar mavjudligiga qaramay, keyingi davrda ayrim paxta tozalash korxonalarida xom ashyoni pnevmotransport tarmog‘iga qo‘lda uzatish holatlari uchramoqda.